Хүн төрөлхтөн бид дэлхий дээрх амьд биетэн болох ургамал амьтдын байгалийн гайхалтай тогтолцоо, нууц чадавхуудыг нь бүрэн тайлж судлаагүй л байгаа. Эрдэмтэд маш жижиг биетэй эрээн далт шувууг дэлхийн хамгийн хурдан нисдэг шувуу болохыг нь саяхан тогтоосон байна. Калифорний их сургуулийн  эрдэмтэд  маш хурдтай хөдөлгөөнийг нарийн тодорхой бичиж, секундэд 500 зураг авах чадалтай камерийн тусламжтайгаар эрээн далт шувууны нислэгийн хурдыг судалжээ.

Судалгааны үр дүнд ердөө 4-өөс 4,5 грамм жинтэй, 10 см-ын урттай байдаг эрээн далт шувуу нь реактив хөдөлгүүртэй онгоц болон сансрын хөлөгнөөс ч хурдтай нисдэг болохыг нь Америкийн эрдэмтэд тогтоожээ. Энэ шувууны эрэгчин нь эмэгчнийхээ анхаарлыг татахын тулд био идэвхтэй үедээ хамгийн хурдан нисдэг байна. Эрээн далт шувууг хамгийн өндөр түвшинд хурдаа авч байхад нь маш чанга дүнгэнэсэн дуу гардаг байна.

Жижиг шувууны аймагт багтдаг эрээн далт шувуу нь 300 гаруй төрөл байдаг байна. Дэлхийн хамгийн хурдан нисдэг шувуу болохыг нь шинээр тогтоогоод байгаа эрээн далт шувуу нь түүнчлэн арагшаа нисч чаддаг цорын ганц шувуу юм. Энэ шувуу дээд тал нь 9 жил насалдаг бөгөөд зүрх нь минутанд 500 удаа цохилдог байна. Дашрамд сонирхуулахад 200 км цагийн хурдтай нисдэг сапсан шонхор нь өмнө нь дэлхийн хамгийн хурдан нисдэг шувуунд тооцогдож байжээ.